Raza Musani 
صنعا: یمنی بحریہ نے برطانیہ اور امریکہ کے دو بحری جہازوں کو نشانہ بنادیا۔ یمنی فوج کے ترجمان یحییٰ السریع نے سوشل میڈیا ایکس پر جاری پیغام میں کہا ہے کہ بحیرہ احمر میں امریکی اور برطانوی جہازوں کے خلاف دو آپریشن کئے گئے۔ پہلے آپریشن میں امریکی جہاز اسٹار ناسیا اور دوسرے آپریشن میں برطانوی جہاز مارننگ ٹائیڈ کو بحری میزائلوں سے نشانہ بنایا۔ میزائل اپنے ہدف پر براہ راست اور درست انداز میں لگے۔ جنرل یحییٰ سریع نے بحیرہ عرب اور بحیرہ احمر میں امریکی اور برطانوی اہداف کے خلاف اضافی فوجی آپریشن کے ارادے کا بھی اظہار کیا اور کہا کہ امریکی اور برطانوی جارحیت ہمیں اپنے مقدس مقاصد اور فلسطینیوں کی حمایت سے نہیں روک سکتی۔یمنی فوج جہاد کی ذمہ داری ادا کررہی ہے ہم اپنے عرب اور مسلمانوں بھائیوں کو تنہا نہیں چھوڑیں گے اور جارح قوتوں کو بحیرہ احمر سے نکال دیا جائے گا۔
