بھارتی پارلیمنٹ میں خواتین تحفظات بل دو تہائی اکثریت سے منظور

نئی دہلی : ہندوستانی پارلیمنٹ میں ایک تہائی نشستیں خواتین کیلئے مخصوص کرنے کا بل دو تہائی اکثریت سے منظور کرلیا گیا۔ خواتین تحفظات بل پر 8 گھنٹے طویل بحث میں ساٹھ ارکان نے حصہ لیا لوک سبھا میں ووٹنگ کے دوران 454 ارکان نے بل کے حق میں اور 2 نے مخالفت میں ووٹ دیا۔ بل کےتحت لوک سبھا اور ریاستی اسمبلیوں میں خواتین کیلئے 33 فیصد نشستیں مخصوص کی جائیں گی۔ اپوزیشن کی جانب سے پسماندہ طبقات کی خواتین کو بھی ایسے ہی فوائد فراہم کرنے اور آئندہ سال انتخابات سے پہلے اس کو نافذ کرنے کا مطالبہ کیا گیا ہے۔۔۔ کانگریس کی رکن سونیا گاندھی نے کہا کہ یہ بل ان کے آنجہانی شوہر اور سابق وزیراعظم راجیو گاندھی کا خواب تھا جنہوں نے 1989 میں خواتین کو مجالس مقامی میں تحفظات دینے کی کوشش کی تھی لیکن ناکام رہے تھے۔ کئی ارکان نے خواتین تحفظات بل کو فوری نافذ کرنے کا مطالبہ کیا اور ان دفعات پر تنقید کی جن میں کہا گیا ہے کہ یہ بل مجوزہ قانون کے آغاز کے بعد پہلی مردم شماری اور حلقوں کی ازسرنو حد بندی کی مشق کے بعد نافذ ہوگا۔