جنگ ختم نہیں ہوئی کیونکہ ایران میں افزودہ یورینیم موجود ہے، نیتن یاہو

تل ابیب: اسرائیلی وزیرِاعظم بن یامین نیتن یاہو کا کہنا ہے کہ ایران کے ساتھ جنگ ابھی ختم نہیں ہوئی کیونکہ تہران کے پاس اب بھی افزودہ یورینیم موجود ہے جسے ایران سے باہر نکالنا ضروری ہے۔ امریکی نشریاتی ادارے سی بی ایس نیوز کو انٹرویو میں بن یامین نیتن یاہو نے کہا کہ امریکا اور اسرائیل کی جنگی کارروائیوں سے بہت کچھ حاصل ہوا۔لیکن ایران کے پاس موجود افزودہ یورینیم اب بھی بڑا مسئلہ ہے۔ ان کا کہنا تھا کہ ایران کی ایٹمی تنصیبات کو ختم کرنا اور تہران کو دوبارہ میزائل اور پراکسی نیٹ ورکس قائم کرنے سے روکنا اس جنگ کے بنیادی مقاصد میں شامل ہے۔ اسرائیلی وزیرِاعظم نے ممکنہ فوجی منصوبوں پر بات کرنے سے گریز کیا، تاہم انہوں نے اشارہ دیا کہ اگر کوئی معاہدہ ہوتا ہے تو یورینیم ذخیرے کو ایران سے نکال لیا جائے گا۔