ایٹمی طاقتوں کا جنگی جنون، ایٹمی ہتھیاروں کی تیاری کے اخراجات میں اضافہ

واشنگٹن : امریکا سمیت 9 ایٹمی طاقتوں کے جنگی جنون میں کمی نہ آسکی۔ اور ایٹمی ممالک نے ایٹمی ہتھیاروں کی تیاری کے لئے اخراجات میں اضافہ کردیا ہے۔ جوہری ہتھیاروں کے خاتمے کی بین الاقوامی مہم نے اپنی ایک رپورٹ میں کہا ہے کہ 9 جوہری ہتھیاروں سے لیس ممالک نے 2021 میں اپنے جوہری ہتھیاروں کو اپ گریڈ کرنے کے لیے 82 ارب 40 کروڑ ڈالر خرچ کیے، جو ایک سال پہلے کے مقابلے میں 8 فیصد زیادہ ہے۔ سب سے زیادہ خرچ کرنے والا ملک امریکاہے۔ اس کے بعد چین، روس، برطانیہ اور فرانس کا نمبر آتا ہے۔ جوہری ہتھیاروں سے لیس ریاستوں نے 2021 میں بڑے پیمانے پر تباہی پھیلانے والے غیر قانونی ہتھیاروں پر بے تحاشا رقم خرچ کی۔ لیکن یہ اخراجات یورپ میں جنگ کو روکنے میں ناکام رہے۔ان ممالک نے قیمتی وسائل کو ضائع کیا جو موجودہ سیکیورٹی چیلنجوں سے نمٹنے کے لیے بہتر طور پر استعمال کیے جا سکتے ہیں۔