آرٹیکل 370 کی دیوار گرادی، ملبہ بھی زمین میں دب گیا، مودی

ادھم پور: ہندوستانی وزیراعظم نریندر مودی نے کہاہے کہ آرٹیکل 370 کی دیوار گرادی ہے۔ اس کا ملبہ بھی زمین میں دب گیا ہے۔ جموں کشمیر کے ضلع ادھم پور میں انتخابی ریلی سے خطاب میں نریندر مودی نے کشمیر میں آرٹیکل 370 کو بحال کرنے کی بات کرنے والی اپوزیشن کو چیلنج کیا اور کہا کہ اگر وہ ایسا کرتے ہیں تو لوگ ان کی طرف آنکھ اٹھا کر بھی نہیں دیکھیں گے۔ انہوں نے ایسا سوچا بھی تو لوگ انہیں نہیں چھوڑیں گے۔ مودی نے کہا کہ لوگ 370 کے بارے میں کنفیوزڈ تھے۔ اب یہ بھرم ٹوٹ گیا ہے۔ انہوں نے کہا کہ کانگریس رام مندر سے کتنی نفرت کرتی ہے، کانگریس کی جانب سے کہا جاتا ہے کہ رام مندر بی جے پی کے لیے انتخابی مسئلہ ہے۔ مودی نے کہا کہ رام مندر ہمارے لئے کبھی بھی انتخابی مسئلہ نہیں رہا۔