Raza Musani 
ماسکو: روس کے وزیر دفاع سرگئی شوئیگو نے الزام عائد کیا ہے کہ امریکی بمبار طیاروں نے رواں ماہ کے شروع میں دو مختلف سمتوں سے روس پر ایٹمی حملے کی مشق کی۔امریکی طیارے روسی سرحد کے 20 کلومیٹر کے قریب آگئے تھے۔ ماسکو نے امریکی اسٹریٹجک بمبار طیاروں کی سرگرمیوں میں نمایاں اضافہ نوٹ کیا ہے جس کے بارے میں ان کے بقول رواں ماہ روسی سرحد کے قریب 30 پروازیں کی گئی تھیں۔ انہوں نے کہا کہ یہ گذشتہ برس کی اسی مدت کے مقابلے میں 2.5 گنا زیادہ ہے۔ روسی وزارت دفاع کے ایک بیان میں سرگئی شوئیگو کا حوالہ دیتے ہوئے کہا گیا ہے کہ وزیر دفاع نے اس بات پر زور دیا کہ امریکی فوجی مشقیں گلوبل تھنڈر کے دوران 10 امریکی اسٹریٹجک بمبار طیاروں نے روس کے خلاف مغربی اور مشرقی سمتوں سے جوہری ہتھیار چلانے کی مشق کی۔ روسی فضائی دفاعی یونٹس نے امریکی اسٹریٹجک بمبار طیاروں کو دیکھا اور ان کا سراغ لگایا اور کسی بھی واقعے سے بچنے کے لیے ضروری اقدامات کیے۔
