ایران اور امریکا کے مذاکرات کا تیسرا دور بھی تعمیری رہا، چوتھا دور ہفتے کو ہوگا

مسقط : ایران اور امریکہ کے درمیان بالواسطہ مذاکرات کا تیسرا دور عمان کی ثالثی میں اختتام پذیر ہوا۔ دونوں ممالک نے مذاکرات کے تیسرے دور کو بھی مثبت اور تعمیری قرار دیا ہے۔ ایران کی وزارت خارجہ کے ترجمان اسماعیل بقائی نے کہا کہ مذاکرات سنجیدہ ماحول میں ہوئے ۔ مذاکرات کے تیسرے دور میں دونوں ملکوں کے تکنیکی ماہرین بھی شامل تھے۔ ایران کی جانب سے نائب وزرائے خارجہ مجید تخت روانچی اور کاظم غریب آبادی جب کہ امریکہ کی جانب سے محکمہ خارجہ کے دفتر برائے پالیسی پلاننگ کے ڈائریکٹر مائیکل اینٹن موجود تھے۔ عمان کے وزیر خارجہ نے ایک پیغام میں اعلان کیا کہ ایران امریکہ مذاکرات آئندہ ہفتہ کو بھی جاری رہیں گے۔ بدر البوسعیدی نے کہا کہ آج ہونے والی بات چیت باہمی احترام اور پائیدار وعدوں پر مبنی ایک معاہدے تک پہنچنے کی مشترکہ خواہش تھی۔ بنیادی اصولوں، مقاصد اور تکنیکی خدشات پر بات چیت کی گئی ہے اور مذاکراتی عمل اگلے ہفتے 3 مئی کو طے شدہ اعلیٰ سطحی میٹنگ میں مزید آگے بڑھے گا۔
ایرانی وزیر خارجہ عباس عراقچی نے مسقط میں ایران اور امریکہ کے درمیان بالواسطہ مذاکرات کے تیسرے دور کے آغاز سے قبل اپنے عمانی ہم منصب ایک دوسرے سے ملاقات کی۔