Raza Musani 
کابل: افغانستان میں طالبان نے پاکستانی فوجیوں کو سرحد پر باڑ لگانے سے روک دیا۔ طالبان وزارت دفاع کے ترجمان عنایت اللہ خوارزمی نے واقعہ کی تصدیق کرتے ہوئے کہا کہ طالبان فورسز نےپاک فوج کومشرقی صوبے ننگرہار کے ساتھ غیرقانونی سرحدی باڑ لگانے سے روک دیا۔ تاہم اب سب کچھ معمول پر آ گیا ہے۔پاکستانی فوج نے تبصرہ کرنے کی درخواست پر کوئی جواب نہیں دیا۔ سوشل میڈیا پر گردش کرنے والی ویڈیو میں دیکھا جاسکتاہے کہ طالبان نے خاردار تاروں کے گُچھے پکڑے ہوئے ہیں اور ایک سینیئر اہلکار نے چوکیوں پر تعینات پاکستانی فوجیوں سے کہا ہے کہ وہ دوبارہ سرحد پر باڑ لگانے کی کوشش نہ کریں۔طالبان ترجمان بلال کریمی نے کہا کہ وہ واقعے کی تحقیقات کر رہے ہیں۔ پاکستان نے کابل کے احتجاج کے باوجود 2,600 کلومیٹر طویل سرحد کے زیادہ تر حصے پر باڑ لگا دی ہے، جبکہ افغانستان برطانوی دور میں کی گئی سرحدی حد بندی کی مخالفت کرتا ہے جس سے دونوں اطراف کے خاندان اور قبائل تقسیم ہوئے۔
