غزہ کی صورتحال تباہ کن سے بھی زیادہ خوفناک ہے، ریڈ کراس

جنیوا : انٹرنیشنل فیڈریشن آف ریڈ کراس کے سیکریٹری جنرل جگن چاپاگین نےکہا ہےکہ اہلیان غزہ جن مصائب اورمشکلات کا سامنا کر رہے ہیں اس کی کوئی نظیر نہیں ملتی ۔ شعبہ صحت تباہی کے دہانے پر ہے اور اسپتالوں کو مایوس کن حالات کا سامنا ہے۔ انہوں نے مزید کہا کہ غزہ میں انسانی صورتحال "تباہ کن” سے آگے ہے۔
اُدھر ورلڈ ہیلتھ آرگنائزیشن کے سربراہ ٹیڈراس اہڈانوم نے اسرائیل سے انسانیت کے نام پر رفح پر حملہ نہ کرنے کی اپیل کی ہے۔ ٹیڈراس اہڈانوم نے کہا ہے کہ وہ رفح پر اسرائیلی حملے کی اطلاعات پر سخت فکرمند ہیں۔ گنجان آباد علاقے میں تشدد میں مزید اضافہ بہت زیادہ اموات اور مصائب کا باعث بنے گا۔ انسانیت کے نام پر ہم اسرائیل سے اپیل کرتے ہیں کہ وہ آگے نہ بڑھے اور امن کے لیے کام کرے۔ اسرائیل رفح پر اپنے منصوبہ بند زمینی حملے کے برعکس فیصلہ کرے۔ انہوں نے کہا کہ حملے سے پہلے آبادی کا انخلا کرنے کا اسرائیلی منصوبہ بھی مسئلے کا حل نہیں ہے۔ کیونکہ کم از کم 12 لاکھ لوگ جو اس وقت رفح میں رہ رہے ہیں ان کے پاس کوئی اور جائے پناہ نہیں ہے کہ یہ وہاں منتقل ہو جائیں۔