سانحہ قندوز میں نمازیوں کی شہادت پر اسلامی حکومتوں کی خاموشی افسوسناک ہے، وفاق المدارس الشیعہ

لاہور : وفاق المدارس الشیعہ پاکستان کے صدر علامہ حافظ سید ریاض حسین نجفی ، سیکریٹری جنرل علامہ محمد افضل حیدری اور نائب صدر علامہ مرید حسین نقوی نے مشترکہ بیان میں افغانستان کے شہر قندوز کی مسجد میں نماز جمعہ کے دوران خود کش حملے میں سو سے زائد نمازیوں کی شہادت کو عظیم المیہ قرارد یا ہے اور افسوس کا اظہار کیا کہ اسلامی حکومتوں اوروطنِ عزیز کی دینی و سیاسی جماعتوں نے اس پر مناسب ردعمل نہیں دیا۔قرآن و سنت کی رو سے پوری امت مسلمہ جسد واحد ہے جس کے ایک عضو کی تکلیف پوری اُمّت کو محسوس کرنا چاہئے۔مگر افسوس معمولی ایشوز پر بیانات دینے والے خاموش ہیں۔ تعزیتی بیان میں انہوں نے کہا کہ خونخوار داعش کی سرگرمیاں طالبان حکومت کے لئے ایک چیلنج اور کارکردگی پر سوالیہ نشان ہے۔اتنے بھیانک اورالمناک سانحے کے بعد بھی داعش کے خلاف کسی آپریشن کا نہ ہونا تشویشناک ہے۔ان کا کہنا تھا کہ ہمارے میڈیا کا نمازِ جمعہ میں شہید ہونے والوں کو ہلاک یا جاں بحق کہنا افسوسناک اور تکلیف دہ ہے ۔نماز جمعہ میں حالتِ نماز میں بے جرم و خطا قتل ہونے والے اگر شہید نہیں توپھر کسے شہید کہا جا سکتا ہے؟۔