Raza Musani 
نیویارک: اقوام متحدہ کی سلامتی کونسل میں 4 ناکام کوششوں کے بعد غزہ میں جنگ بندی کی قرارداد منظور کرلی گئی۔ غزہ میں فوری جنگ بندی کی قرارداد کی سلامتی کونسل کے 15 میں سے 14 ارکان نے حمایت کی جبکہ امریکا نے ووٹنگ میں حصہ نہیں لیا۔ قرارداد سلامتی کونسل کے 10 رکن ممالک نے پیش کی تھی۔ جن میں الجزائر، جاپان، جنوبی کوریا اور دیگر شامل ہیں۔ قرارداد میں تمام یرغمالیوں کی فوری اور غیر مشروط رہائی کا مطالبہ بھی کیا گیا ہے۔ قرارداد میں غزہ میں شہریوں کے تحفظ کے لیے انسانی امداد کی ترسیل کو بڑھانے اور اس کو بہتر کرنے کی فوری ضرورت پر زور دیا گیا ہے اور انسانی امداد کی فراہمی کی راہ میں حائل تمام رکاوٹوں کو ہٹانے کے مطالبے کا اعادہ کیا گیا ہے۔ گزشتہ ہفتے امریکا نے غزہ میں جنگ بندی کی قرارداد پیش کی تھی جسے روس اور چین نے ویٹو کردیا تھا جب کہ اس سے پہلے تین قراردادوں کو امریکا ویٹو کرچکا ہے۔
