فلسطینیوں کی بیدخلی کا منصوبہ مضحکہ خیز اور بے معنی ہے، حماس

دوحہ : حماس نے امریکی صدر ڈونلڈ ٹرمپ کے فلسطینیوں کو غزہ سے نکالنے پر اصرار کی مذمت کرتے ہوئے اسے لغو اور بے معنی قرار دیا ہے۔ حماس کے سینئر رہنما سمیع ابو زہری نے کہا کہ غزہ سے فلسطینیوں کو بے گھر کرنے کے منصوبے مضحکہ خیز اور بے معنی ہیں۔ انہوں نے زور دے کر کہا کہ صیہونی حکومت جو اہداف طاقت کے ذریعے حاصل کرنے میں ناکام رہی وہ سیاسی ہتھکنڈوں سے پورا کرنے میں بھی ناکام رہے گی۔ ابو زہری نے مذکورہ منصوبوں کو خطے میں مزید انتشار اور کشیدگی کا ایک نسخہ قراردیا انہوں نے کہا کہ غزہ کی پٹی سے فلسطینیوں کو اس کی تعمیر نو کے بہانے بے گھر کرنے کے بار بار امریکی اعلانات جرم میں مسلسل ملوث ہونے کی عکاسی کرتے ہیں۔