افغانستان کے ساتھ خراب تعلقات کا تاثر درست نہیں، پاکستان

اسلام آباد: پاکستان نے افغانستان کے زلزلہ زدگان کیلئے امداد واپس کرنے پر قیاس آرائیاں مسترد کردیں۔ پاکستان کے نگراں وزیر خارجہ جلیل عباس جیلانی نے اسلام آباد میں نیوز کانفرنس میں کہا کہ افغانستان کے ساتھ خراب تعلقات کا تاثر درست نہیں ہے۔ دونوں ممالک کے تعلقات بہت اچھے اور صدیوں پرانے ہیں۔ تعلقات کی نوعیت اتنی مضبوط ہے کہ اس کی انتہا نہیں اور یہ آج کل کے زمانے کی بات نہیں ہے۔ انہوں نے کہا کہ افغانستان نے امداد کے لیے رابطہ کیا تھا اور پاکستان نے امدادی سامان بھیجنے کا انتظام بھی کر لیا تھا لیکن بعد میں کہا گیا کہا کہ داخلی طور پر ضرورت پوری ہو گئی ہے۔ اسے کوئی اور رنگ دینا مناسب نہیں ہو گا۔ انہوں نے کہا کہ جب بھی افغانستان کے عوام پر کوئی افتاد پڑی تو ایک ہی ملک تھا جس کی طرف افغانستان نے دیکھا وہ پاکستان تھا۔