غزہ کے عوام ایک تاریخی انسانی تباہی کے دہانے پر ہیں، اقوام متحدہ

نیویارک : اقوام متحدہ کے سربراہ انتونیو گوٹیرس نے کہا ہے کہ غزہ میں کوئی جگہ محفوظ نہیں۔ اسی فیصد باشندوں کو گھر چھوڑنے پر مجبور کردیا گیا ہے۔ سلامتی کونسل سے خطاب میں انتونیو گوتریس نے کہا کہ بڑے پیمانے پر اموات اور تباہی آبادی والے علاقوں میں وسیع پیمانے پر دھماکہ خیز ہتھیاروں کے استعمال کا نتیجہ ہے۔ انہوں نے کہا کہ غزہ میں اسرائیلی فوجی کارروائیوں میں بچوں کی ہلاکتیں میرے سیکرٹری جنرل رہنے کے بعد سے کسی بھی واقعہ میں مارے گئے بچوں کی کل تعداد سے کہیں زیادہ ہے انہوں نے کہاکہ غزہ کے لوگ ایک تاریخی انسانی تباہی کے دہانے پر ہیں۔ اقوام متحدہ کے سربراہ کا کہنا ہے کہ ایک اندازے کے مطابق غزہ میں تمام گھروں میں سے 45 فیصد کو نقصان پہنچا یا تباہ ہو چکے ہیں۔ انتونیو گوتریس نے کہاکہ غزہ میں جنگ بندی کو طول دینے کے لیے مذاکرات کیے جا رہے ہیں، لیکن حقیقی انسانی بنیادوں پر جنگ بندی کی ضرورت ہے۔