فلسطینی ریاست قبول نہیں، اسرائیلی وزراء کی ہٹ دھرمی

تل ابیب: صیہونی وزراء نے ایک بار پھر واضح کر دیا ہے کہ حکومت کسی فلسطینی ریاست کے قیام کو قبول نہیں کرے گی۔ اسرائیلی وزیر دفاع اسرائیل کاٹز نے کہا کہ اسرائیل کی پالیسی بالکل صاف ہے کہ فلسطینی ریاست کا کوئی امکان نہیں۔ ان کے مطابق غزہ کو آخری سرنگ تک غیر عسکری بنایا جائے گا اور حماس کو یا تو اسرائیلی فوج یا بین الاقوامی استحکام فورس کے ذریعے بے اثر کیا جائے گا۔
وزیر خارجہ گیڈون سار نے بھی مؤقت دہرایا کہ اسرائیل فلسطینی ریاست کے قیام پررضامند نہیں ہوگا۔
وزیر قومی سلامتی اتمار بن گوئر نے کہا کہ فلسطینی قوم کا کوئی وجود ہے اور نہ ہی ان کی کوئی تاریخ ہے۔ فلسطینیوں کو ریاست دینا دہشت گردی کو انعام دینے کے مترادف ہے اور ان کےمطابق غزہ کا حل فلسطینیوں کی بیدخلی ہے۔وزیرخزانہ بیزالیل اسموٹریچ نے وزیراعظم نیتن یاہو سے سوال کیا کہ بعض ممالک کے فلسطینی ریاست کو تسلیم کرنے کے معاملے پر آپ نے سخت ردعمل کا اعلان کیا تھا مگر اس کے بعد دو ماہ گزر گئے اور آپ نے خاموشی اور سیاسی ذلت کا راستہ اختیار کیا۔ اسموٹریچ نے نیتن یاہو سے مطالبہ کیا کہ وہ فوری اور فیصلہ کن رد عمل پیش کریں تاکہ پوری دنیا کو یہ واضح ہو کہ فلسطینی ریاست کبھی نہیں قائم ہو گی۔