مسئلہ فلسطین فوجی ذرائع سے حل نہیں کیا جا سکتا، ای تھری ممالک

پیرس: فرانس، جرمنی اور برطانیہ نے غزہ میں اموات پر پریشانی کا اظہار کرتے ہوئے اعتراف کیا ہے کہ تنازعہ کو فوجی ذرائع سے حل نہیں کیا جا سکتا۔ تینوں ممالک پر مشتمل گروپ ای تھری نے ایک بیان میں کہا کہ غزہ میں اسرائیلی حملوں کا دوبارہ آغاز غزہ کے لوگوں، یرغمالیوں، ان کے خاندانوں اور پورے خطے کے لیے ایک ڈرامائی قدم ہے۔ بیان میں فریقین پر زور دیا گیا کہ وہ جنگ بندی کے مکمل نفاذ اور اسے مستقل بنانےکے لیے مذاکرات دوبارہ شروع کریں۔ جس میں یرغمالیوں کی رہائی بھی شامل ہونی چاہیے۔ بیان میں جنگ بندی کی بحالی کا مطالبہ کرتے ہوئے اسرائیل پر زور دیا کہ وہ بین الاقوامی قانون کا مکمل احترام کرے اور انسانی امداد تک فوری رسائی کی اجازت دے۔ لڑائی میں واپسی کا نتیجہ صرف مزید فلسطینی شہریوں اور اسرائیلی یرغمالیوں کی ہلاکت کا باعث بنے گا۔