مسائل کا واحد حل انقلاب کے اصولوں سے وابستگی ہے، ولی امر مسلمین

تہران : ولی امر مسلمین آیت اللہ سید علی خامنہ ای نے کہا ہے کہ ملک کے مسائل کا واحد حل انقلاب کے اصولوں سے وابستگی ہے۔
وزارت انٹیلی جنس کے سینئر حکام سے ملاقات میں آیت اللہ العظمی خامنہ ای نے اس بات پر زور دیا کہ ملک کو درپیش چیلنجز کے حل کے لیے اللہ پر توکل، انقلابی اصولوں کی پاسداری اور موجودہ قوانین و پالیسیوں پر مخلصانہ عمل درآمد ناگزیر ہے۔ انہوں نے کہا کہ محض منصوبہ بندی کافی نہیں، بلکہ عملی نتائج کا حصول ضروری ہے۔ جب تک منصوبوں پر مستقل مزاجی سے عمل نہ ہو، ان کا کوئی فائدہ نہیں۔ انہوں نے وزارت انٹیلی جنس کی بنیادی ذمہ داریوں میں سے ایک حکومت کے ساتھ تعاون کو قرار دیا اور کہا کہ یہ وزارت ہر حکومت کے ساتھ مکمل ہم آہنگی میں کام کرے، تاکہ ملک کی انتظامی ذمہ داریاں بہتر انداز میں ادا کی جاسکیں۔ آیت اللہ خامنہ ای نے ملکی انٹیلی جنس اداروں کے درمیان ہر سطح پر باہمی تعاون اور ہم آہنگی پر بھی زور دیا اور انٹیلی جنس برادری کے لیے اخلاقی تزکیہ اور روحانی تربیت کو ضروری قرار دیا۔ انہوں نے فلسطینی عوام کے ساتھ عالمی ہمدردی اور یورپ و امریکہ میں صیہونیت مخالف مظاہروں کو اللہ کی مشیت کا مظہر قرار دیا جو اسلام کی سربلندی کے لیے راہ ہموار کر رہا ہے۔