معاہدے تک نہ پہنچنے کی بنیادی وجہ نیتن یاہو ہیں، حماس

بیروت : حماس کے سینئر ترجمان اسامہ حمدان نے کہا ہے کہ نیتن یاہو مذاکرات کے معاملے پر ابھی بھی گیم کھیل رہا ہے۔ الجزیرہ سے انٹرویو میں اسامہ حمدان نے کہا کہ معاہدے تک نہ پہنچنے کا بنیادی نکتہ نیتن یاہو اور ان کے کھیل ہیں۔ وہ کوشش کر رہا ہے کہ کوئی انتظام یا معاہدہ نہ ہو۔ یہ بات بالکل واضح ہے۔ انہوں نے کہا کہ اسماعیل ہنیہ نے مذاکرات کے حوالے سے مثبت پوزیشن لی ہے اور جنگ بندی کےلیے آمادگی کا اظہار کیا ہے۔ گذشتہ روز اسماعیل ہنیہ نے بھی کہا تھا کہ جنگ بندی معاہدے تک پہنچنے میں پیش رفت کی کمی کا ذمہ دار اسرائیل ہے۔ ہم جارحیت کے مکمل خاتمے۔غزہ سے قابض فوج کے انخلاء اور ناجائز محاصرہ اٹھانے سے کم کسی چیز کو قبول نہیں کریں گے۔ اسماعیل ہنیہ نے کہا کہ ہم نے اپنے لوگوں کے خلاف جارحیت کو روکنے کے لیے ثالثوں کو مثبت اور ذمہ داری سے جواب دیاہے۔ لیکن اسرائیل ہمارے لوگوں کے لیے اہم مسائل پر مسلسل تاخیر کر رہا ہے، جب کہ اس کا موقف قیدیوں کی رہائی پر مرکوز ہے۔