Raza Musani 
غزہ: فلسطینیوں کو دھوکا دہی سے دوسرے ممالک میں غیر قانونی ہجرت کرانے کا اسرائیلی منصوبہ بے نقاب ہوگیا۔ صیہونی حکومت کا منصوبہ اس وقت سامنے آیا جب ایک سو تریپن فلسطینیوں کو لیکر طیارہ جنوبی افریقا کے دارالحکومت جوہانسبرگ پہنچا۔ دستاویزات نہ ہونے کی وجہ سے فلسطینی کئی گھنٹے تک ایئرپورٹ پر پھنسے رہے بعد میں جنوبی افریقا کی حکومت نے انسانی ہمدردی کی بنیاد پر انہیں بغیر دستاویزات نوے دن ویزا کی چھوٹ دیدی۔
طیارے نے اسرائیل کے رامون ایئرپورٹ سے اڑان بھری تھی اور کینیا کے دارالحکومت نیروبی کے راستے جوہانسبرگ پہنچا تھا۔ نیروبی میں سرحدی پولیس نے 153 مرد، خواتین اور بچوں کو بارہ گھنٹے سے زیادہ حراست میں رکھا کیونکہ ان کے پاسپورٹس میں اسرائیل سے روانگی کا اسٹیمپ موجود نہیں تھا۔ بعد میں انہیں جانے کی اجازت دیدی گئی۔ فلسطینی وزارت خارجہ نے اسے انسانی اسمگلنگ قرار دیا ہے۔اور فلسطینیوں کو خبردار کیا کہ وہ کمپنیاں اور ادارے جو فلسطینیوں کو دھوکہ دہی سے ہجرت پر اکساتے ہیں یا انسانی اسمگلنگ میں ملوث ہیں ان کے خلاف کارروائی کی جائے گی۔
وزارت نے فلسطینی خاندانوں، خاص طور پر غزہ میں رہنے والوں کو خبردار کیا کہ وہ غیر رسمی یا غیر رجسٹرڈ اداروں سے محتاط رہیں۔
