اسرائیلی کابینہ نے بھی جنگ بندی معاہدے کی توثیق کردی

تل ابیب: اسرائیل کی سیکیورٹی کابینہ کی منظوری کے بعد مکمل کابینہ نے بھی جنگ بندی معاہدے کی توثیق کر دی۔ چھ گھنٹے سے زائد عرصے تک جاری رہنے والے اجلاس میں کابینہ معاہدے کی توثیق کی گئی۔ جس کے تحت غزہ میں اسرائیل کے 15 ماہ سے جاری حملوں کے خاتمے کی راہ ہموار ہو سکے گی۔
چوبیس وزرا نے معاہدے کے حق میں ووٹ دیا جبکہ آٹھ وزرا نے مخالفت کی۔ نیتن یاہو کے دفتر سے جاری مختصر بیان میں کہا گیا ہے کہ یرغمالیوں کی رہائی کا فریم ورک اتوار سے نافذ العمل ہو جائے گا۔ معاہدے کے تحت 3 مراحل پر مشتمل جنگ بندی کا آغاز ابتدائی 6 ہفتوں کے مرحلے سے ہوگا جس میں حماس کے زیر حراست یرغمالیوں کا تبادلہ اسرائیل کی جانب سے حراست میں لیے گئے قیدیوں کے بدلے سے کیا جائے گا۔ اسرائیل نے پہلے مرحلے میں 33 اسرائیلیوں کی تصویریں جاری کردی ہیں۔