Raza Musani 
القدس: اسرائیلی وزیراعظم کی جانب سے رفح پر حملے کی منظوری کے بعد اسرائیلی فوج کی کارروائیاں تیز ہوگئی ہیں۔ اسرائیلی فوج نے خان یونس میں اسپتال کو نشانہ بنایا ہے جس میں سترہ افراد شہید ہوگئے۔ اسپتال ذرائع کے مطابق شہدا میں ڈاکٹر، طبی عملہ اور مریض شامل ہیں۔ جنہیں اسرائیلی فوج کے اسنائپرز نے نشانہ بنایا۔
رفح میں اسرائیلی فضائیہ نے دو عمارتوں کو نشانہ بنایا ہے جس میں شہادتیں 30 ہوگئی ہیں۔اسرائیلی وزیراعظم نے جنگی کابینہ میں رفح پر حملے کی منظوری دے دی ہے۔ اسرائیلی وزارت دفاع نے غزہ کے شہر رفح میں حملے کی صورت میں بڑے پیمانے پر ہلاکتوں کا خدشہ ظاہر کیا تھا ۔اسرائیلی وزیراعظم نیتن یاہو نے رفح میں عالمی برادری کے مطالبے کو نظرانداز کردیا ہے اور فوج کو زمینی آپریشن کا حکم دے دیا ہے۔ رفح میں سترہ لاکھ سے زائد فلسطینی پناہ لیے ہوئے ہیں۔ تین دن سے اسرائیلی فضائیہ رفح پر بمباری کررہی ہے۔ خان یونس پر بھی اسرائیلی بمباری جاری ہے اور مجموعی شہادتیں اٹھائیس ہزار تک پہنچ گئیں ہیں۔
