غزہ پر اسرائیلی جارحیت نے مغربی تہذیب کی شرانگیز اور شیطانی فطرت آشکار کردی، ولی امر مسلمین

تہران : ولی امر مسلمین آیت اللہ سید علی خامنہ ای نے کہاہے کہ محصور غزہ کی پٹی میں فلسطینیوں کے خلاف کئی ماہ سے جاری جارحیت نے مغربی تہذیب کی شرانگیز اور شیطانی فطرت کو بے نقاب کردیا۔ تہران میں مصلیٰ امام خمینی ؒ پر نماز عید الفطر کی امامت کے بعد خطاب میں ولی امر مسلمین نے کہاکہ رواں سال پیش آنے والے واقعات میں مغربی حکومتوں نے مغربی تہذیب کی شیطانی فطرت کو بے نقاب کیا۔ جبکہ غزہ میں گزشتہ چھ ماہ کے دوران مغربی حکومتوں نے خود اس شیطانی فطرت کی کو دنیانظروں کے سامنے پیش کیا۔ ولی امر مسلمین نے کہا کہ مغرب کی طاقت کا مزاحمت کاروں سے کوئی موازنہ نہیں اس لئے وہ بچوں اور مظلوموں کی جانیں لے لیتے ہیں اور تیس ہزار سے زیادہ بے گناہ لوگوں کو مار دیتے ہیں۔ انہوں نے کہا کہ کہاں ہیں وہ لوگ جن کی انسانی حقوق پر آوازیں پوری دنیا کے کانوں میں گونجتی ہیں؟ کیا اہلیان غزہ انسان نہیں ہیں؟ کیا ان کا کوئی حق نہیں؟۔ ولی امر مسلمین نے کہا کہ مغربی حکومتوں نے برسوں سے ہمیشہ اسرائیل کی مدد اور حمایت کی ہے اور بین الاقوامی حلقوں میں حکومت کی حمایت کی ہے اور اسے ہر قسم کی امداد فراہم کی ہے۔ انہیں حالیہ آفت میں صیہونی حکومت کے جرائم کو روکنا چاہئے تھا لیکن مغربی حکومتوں نے اپنا فرض پورا نہیں کیا۔ کچھ لوگوں نے حمایت میں بات کی لیکن عملی طور پر وہ نہ صرف روکنے میں ناکام رہے بلکہ خاص طور پر امریکہ اور برطانیہ کی متکبر اور ظالم حکومت نے جنگ میں بھی حصہ لیا۔
انہوں نے کہا کہ ہر ملک کا سفارت خانہ یا قونصل خانہ اس کی سرزمین کا حصہ ہوتا ہے۔ صیہونی حکومت نے شام میں قونصل خانے پر حملہ کرکے غلطی کی جس کا اسے خمیازہ بھگتنا ہوگا۔ اس مجرمانہ عمل پر اسے سخت سزا دینی چاہئے۔