جس اسلام میں سیاست نہیں، وہ امریکی اسلام ہے، علامہ راجہ ناصر عباس

اسلام آباد: سربراہ مجلس وحدت مسلمین سینیٹر علامہ راجہ ناصر عباس نے کہا ہے کہ امامت و حسینیت سے سیاست کو نکالنا ناممکن ہے، ایسا کہنے والے یا نادان ہیں یا منافق ہیں۔ انہوں نے کہا کہ اہلبیت علیہم السلام کے ادوار کو پڑھیں، کیوں حکومتیں زہر دے کر ہر امام کو شہید کرتی رہیں؟ کیوں اماموں کو زندانوں میں قید رکھا جاتا رہا؟ ان کا کہنا تھا کہ امام حسینؑ نے فرمایا کہ جو معصوم لوگوں کو قتل کرتا ہے۔ جو ان کے حقوق چھینتا ہے میری اس سے جنگ ہے۔ یہی حکم قرآن کریم بھی ہر مسلمان پر لاگو کرتا ہے کہ کفار کو خود پر مسلط نہیں ہونے دینا۔ ان کے سیاسی، معاشی، سماجی، تسلط کا مقابلہ کرنا ہے۔ انہوں نے کہا کہ آج جو یہ کہہ رہا ہے کہ حسینیت زندہ باد کے نعرے نہ لگاؤ، اس سے سیاست کی بو آتی ہے، ہمیں اس کے الفاظ سے منافقت کی بو آ رہی ہے۔ ہمیشہ سیاسی اسلام ہی انقلاب لایا ہے، سیاسی انقلاب نے ہی حرمین کا دفاع کیا۔ سیاسی اسلام لبنان میں اٹھا اور اسرائیل کو شکست دی، یہی اسلام کفار کے مقابلے میں ہے۔ انہوں نے کہا کہ جس اسلام میں سیاست نہیں، وہ امریکی اسلام ہے چاہے وہ شیعیت کی شکل میں ہو یا سنیت کی شکل میں، یہ اسلام محمدی نہیں ہے۔