Raza Musani 
غزہ : ماہ رمضان میں بھی اسرائیل غزہ میں فلسطینیوں کے قتل عام میں مصروف ہے۔ جنوبی رفح۔سینٹرل غزہ ، دیرالبلاح اور جبالیہ میں اسرائیلی فوج کے حملوں میں اکانوے فلسطینی شہید ہوگئے۔ غزہ میں فلسطینی کہیں محفوظ نہیں ہیں۔
مصر کی سرحد کے قریب رفح میں اسرائیلی فوج نے امداد کے متلاشی افراد پر فائرنگ کردی۔ جس سے چودہ فلسطینی شہید ہوگئے۔سینٹرل غزہ میں اسرائیل فوج کے حملے میں چھ فلسطینی شہید ہوئے۔ دیرالبلاح میں دو عمارتوں کو اسرائیلی فوج نے نشانہ بنایا جس سے تیس افراد لقمہ اجل بنے۔ جبالیہ پر حملے میں عورتوں اور بچوں سمیت بیس فلسطینی شہید ہوگئے۔ خان یونس میں اسرائیلی فوج کی فائرنگ سے دس افراد شہید ہوگئے۔ خان یونس میں حماس نے چھاپہ مار کارروائی کرتے ہوئے ایک اسرائیلی بکتر بند گاڑی کو تباہ کردیا۔ حماس کے مطابق حملے میں متعدد اسرائیلی فوجی ہلاک ہوئے ہیں۔ اسرائیل نے ایک فوجی کی ہلاکت کی تصدیق کردی ہے۔
