انسانی حقوق کونسل میں اسرائیل کے خلاف قرارداد منظور

جنیوا : اقوام متحدہ کی انسانی حقوق کونسل نے اسرائیل سے غزہ میں ممکنہ جنگی جرائم اور انسانیت کے خلاف جرائم کے لیے جوابدہی کا مطالبہ کرنے کی قرارداد منظور کرلی۔
انسانی حقوق کونسل میں اٹھائیس ممالک نے قرارداد کےحق میں ووٹ دیا۔ تیرہ ممالک غیر حاضر رہے۔ امریکا اور جرمنی سمیت چھ ممالک نے اسکی مخالفت کی۔ اسرائیل نے اسے تحریف شدہ متن قرار دے کر مسترد کر دیا۔ قرارداد میں استثنیٰ کو ختم کرنے کے لیے بین الاقوامی انسانی قانون اور بین الاقوامی انسانی حقوق کے قانون کی تمام خلاف ورزیوں کے لیے احتساب کو یقینی بنانے کی ضرورت پر زور دیا گیا ہے۔ قرارداد میں مقبوضہ فلسطینی علاقے میں ممکنہ جنگی جرائم اور انسانیت کے خلاف جرائم سمیت انسانی حقوق کی سنگین خلاف ورزیوں اور بین الاقوامی انسانی قانون کی سنگین خلاف ورزیوں کی رپورٹس پر بھی گہری تشویش کا اظہار کیا گیا ہے۔