Raza Musani 
تہران : ولی امر مسلمین آیت اللہ خامنہ ای نے کہا ہے کہ صیہونی درندگی اور جرائم، جسے مغرب کی مکمل حمایت حاصل ہے کے مقابل غزہ کے عوام کا تاریخی صبر بہت عظیم ہے جس نے اسلام کا سر بلند اور عالمی ترجیحات کو تبدیل کردیا۔ حماس کے سربراہ اسماعیل ہنیہ کی زیر قیادت وفد سے ملاقات میں ولی امر مسلمین نے کہا کہ دشمن کی خواہش کے برخلاف مسئلہ فلسطین، دنیا کے اہم ترین مسئلے میں تبدیل ہوگیا۔ غزہ کے عوام کا قتل عام اور ان کی نسل کشی ہر با ضمیر انسان کو متاثر کررہی ہے اور اسلامی جمہوریہ ایران غزہ کے مظلوم اور صابر عوام کی حمایت میں کسی بھی کوشش سے دریغ نہیں کرے گا۔ انہوں نے بین الاقوامی رائے عامہ اور عرب دنیا کے عوام کی جانب سے غزہ کے عوام کی حمایت کو بہت اہم قرار دیا اور کہاکہ فلسطین کے استقامتی محاذ کے تشہیراتی اور ابلاغیاتی اقدامات اب تک بہت اچھے تھے اور صیہونی دشمن سے سبقت لے گئے، اس میدان میں مزید اہتمام کی ضرورت ہے۔ انہوں نے کہا کہ فلسطینیوں اور غزہ کے عوام کو مدد فراہم کرنے کی ایران کی ایک طے شدہ پالیسی ہے ایران فلسطینی کاز اور غزہ کے مظلوم اور مستعد عوام کی حمایت سے کبھی دریغ نہیں کرے گا۔
