غزہ میں صحت کی صورتحال تباہی کے دہانے پر پہنچ گئی، ڈبلیو ایچ او

جنیوا: عالمی ادارہ صحت نے خبردار کیا ہے کہ ناکابندی کی وجہ سے غزہ میں انسانی صحت کی صورتحال مکمل طور پر تباہی کے دہانے پر جاپہنچی ہے۔ ڈبلیو ایچ او کی ترجمان مارگریٹ ہیرس نے ایک بیان میں ناکابندی کے سنگین اثرات کو اجاگر کرتے ہوئے کہاہےکہ غزہ کے شہری صاف پانی، رہائش اور طبی امداد سے محروم ہیں۔ انہوں نے کہا کہ خوف اتنا وسیع ہے کہ بہت سے رہائشی اسپتالوں میں جانے سے بھی ڈرتے ہیں۔ جنہیں جاری تنازعہ کے دوران بار بار نشانہ بنایا جاتا رہا ہے۔ انہوں نے کہا کہ ہیلتھ ورکرز ضروری طبی سامان کی شدید قلت کی وجہ سے زخمیوں کے علاج کے لیے جدوجہد کر رہے ہیں۔ انہوں نے کہا کہ خون کے تھیلے اور یونٹس، زخموں کی صفائی کیلئے روئی اور انفیکشن سے بچنے کے لیے اینٹی بائیوٹک تک ہر چیز کی کمی ہے۔