غزہ کی پٹی بچوں کا قبرستان بنتی جا رہی ہے، گوتریس

نیویارک: اقوام متحدہ کے سیکریٹری جنرل انتونیو گوتیریس نے خبردار کیاہےکہ غزہ کی پٹی بچوں کا قبرستان بنتی جا رہی ہے۔
نیویارک میں میڈیا سے گفتگو میں انتونیو گوتیریس نے کہاکہ دن بدن شدت اختیار کرتا تنازعہ دنیا اور خطے کو ہلا رہا ہے۔ غزہ کا ڈراؤنا خواب ایک انسانی بحران سے بڑھ کر ہے۔ انہوں نےکہاکہ اسرائیلی فوج شہریوں، اسپتالوں، پناہ گزین کیمپوں، مساجد، گرجا گھروں اور اقوام متحدہ کی تنصیبات کو نشانہ بنا رہی ہے۔ غزہ میں کوئی جگہ بھی محفوظ نہیں ہے۔ انہوں نے انسانی بنیادوں پر جنگ بندی کا مطالبہ کرتے ہوئے کہا کہ بین الاقوامی انسانی قوانین کی صریح خلاف ورزیاں کی جا رہی ہیں۔ مسلح تصادم کا کوئی بھی فریق بین الاقوامی انسانی قانون سے بالاتر نہیں ہے۔ ہمیں اس سفاکانہ، ہولناک، اذیت ناک تباہی کے آخری انجام سے نکلنے کے لیے ابھی عمل کرنا چاہیے۔
غزہ اور مصر کے درمیان رفح کراسنگ کو مریضوں، غیر ملکیوں کے انخلا کے لیے دوبارہ کھول دیا گیا۔ دو روز پہلے ایمبولنس پر اسرائیلی حملے کے بعد رفح کراسنگ کو بند کردیا گیا تھا۔