Raza Musani 
نیویارک: اقوام متحدہ کے سیکریٹری جنرل انتونیو گوتریس نے خبردار کیا ہےکہ اسرائیلی کالونیوں کی مسلسل توسیع نے مجوزہ فلسطینی ریاست کے وجود کو خطرے میں ڈال دیا ہے۔ سلامتی کونسل کی دو ہزار سولہ کی قرارداد نمبر 2334 پر عملدرآمد پر اپنی رپورٹ میں انتونیو گوتریس نے اسرائیلی بستیوں میں مسلسل توسیع کی مذمت کی اور انہیں بین الاقوامی قانون کی کھلم کھلا خلاف ورزی قرار دیا۔ انتونیو گوتریس نے کہا کہ اسرائیلی بستیوں کی مسلسل توسیع مشرقی یروشلم اور مقبوضہ مغربی کنارے کے منظرنامے اور آبادیات کو ڈرامائی طور پر تبدیل کر رہی ہے۔ اور قابل عمل اور آزاد فلسطینی ریاست کے نفاذ کے لیے وجودی خطرہ لاحق ہو رہا ہے۔ انہوں نے کہا کہ فلسطینیوں کی ملکیتی عمارتوں کو مسمار کرنے اور قبضے میں لینے سے انسانی حقوق کی متعدد خلاف ورزیاں ہوتی ہیں اور زبردستی منتقلی کے خطرے کے بارے میں خدشات جنم لیتے ہیں۔
