Raza Musani 
اسلام آباد: نئے صدر کے لئے الیکشن کل ہوگا۔ آصف زرداری اور محمود اچکزئی امیدوار ہیں۔ صدارتی الیکشن میں قومی اسمبلی۔ سینیٹ اور چاروں اسمبلیوں کے ارکان ووٹ ڈالیں گے۔ تمام اسمبلیوں کے ارکان کی مجموعی تعداد 1185 ہے ۔ جبکہ الیکٹرول کالج کے تحت یہ تعداد 696 بنتی ہے۔ عدالتی چارہ جوئی اور نشستیں خالی ہونے کی وجہ سے یہ تعداد 655 رہ گئی اور 327 ووٹ حاصل کرنے والا کامیاب شمار ہوگا۔ ادھر پشتونخوا ملی عوامی پارٹی کے چیئرمین اور صدارتی امیدوار محمود خان اچکزئی نے صدارتی انتخاب ملتوی کرنے کا مطالبہ کر دیا۔انہوں نے الیکشن کمیشن کے نام خط میں مطالبہ کیا ہےکہ قومی اور صوبائی اسمبلیوں کی متعدد مخصوص نشستیں ابھی خالی ہیں۔الیکٹورل کالج مکمل ہونے تک الیکشن ملتوی کیا جائے۔ اس سے پہلے موجودہ صدر مملکت ڈاکٹر عارف علوی کے اعزاز میں الوداعی گارڈ آف آنر پیش کیاگیا۔ وہ کل اپنے عہدے سے سبکدوش ہو جائیں گے۔
