مذاکرات کا دروازہ ہمیشہ کھلا نہیں رہے گا، ایرانی وزیر خارجہ

تہران : ایران کے وزیر خارجہ حسین امیرعبداللھیان نے کہا ہے کہ پابندیوں کے خاتمے کے لیے مذاکرات کے دروازے کھلے ہیں تاہم انہوں نے خبردار کیا ہے کہ یہ کسی بھی وقت بند ہوسکتے ہیں۔ حسین امیر عبداللھیان نے آئی اے ای اے کے ڈائریکٹر جنرل کے مجوزہ دورے کی جانب اشارہ کرتے ہوئے کہا کہ تہران اور عالمی ایجنسی کے درمیان تعاون اپنے منطقی اور صحیح راستے پر گامزن ہے۔ ہم نے بلواسطہ طور پر امریکیوں پر واضح کردیا ہے کہ تہران اب بھی سمجھوتے کے راستے پر کھڑا ہے۔ ایرانی پارلیمنٹ میں نئے قانون کی منظوری کی صورت میں حکومت اس پر عملدرآمد کی پابند ہوگی لہذا سمجھوتے کے حصول کا راستہ ہمیشہ کھلا نہیں رہے گا۔ انہوں نے کہا کہ امریکہ نے سفارتی چینلوں کے ذریعے مذاکرات کے بارے میں بعض مثبت پیغامات ارسال کیے ہیں لیکن، میڈیا پر جو موقف پیش کر رہا ہے وہ اس سے بالکل مختلف ہے۔