Raza Musani 
غزہ: صیہونی فوج کے غزہ پر وحشیانہ حملوں کا سلسلہ جاری ہے۔ رہائشی عمارتوں پر بمباری اور گولہ باری سے مزید درجنوں افراد شہید اور زخمی ہوگئے۔ صیہونی جنگی طیاروں نے رات بھر غزہ کے مختلف مقامات پر بم برسانے کا سلسلہ جاری رکھا۔ ڈرونز سے رہائشی عمارتوں کو نشانہ بنایا گیا۔ جبکہ گولی باری کا سلسلہ بھی جاری ہے۔
دیر البلاح میں تین منزلہ عمارت نشانہ بنی ۔ نصیرات کیمپ میں کئی مکانات ملبے کا ڈھیر بن گئے۔ اسپتال لاشوں اور زخمیوں سے بھرے پڑے ہیں۔ مجموعی طور پر شہدا کی تعداد 17 ہزار تک جاپہنچی ہے جبکہ سات ہزار لاشیں ملبے تلے دبی ہوئی ہیں۔ گذشتہ روز کمال عدوان اسپتال اور دوسرے مقامات پر بمباری سے سو سے زیادہ افراد شہید ہوئے۔وزارت صحت کا کہنا ہے کہ کمال عدوان میں بھی الشفا اسپتال جیسی سفاکیت دوہرائی جارہی ہے۔ اسپتال سے نکلنے والے شخص کو اسنائپر سے نشانہ بنایا جارہا ہے۔
