Raza Musani 
دی ہیگ : غزہ اور مقبوضہ فلسطین کے مغربی کنارے اور مشرقی بیت المقدس پر اسرائیل کے 57 سالہ قبضہ کے خلاف عالمی عدالت انصاف میں سماعت تیسرے دن بھی جاری رہی۔ روس کے سفیر ولادیمیر ترابرین نے دلائل دیتے ہوئے کہا کہ غزہ کی صورتحال خوفناک ہے، اسرائیل کے بلا امتیاز حملے شہریوں کو مار رہے ہیں۔ غزہ کے 90 فیصد سے زیادہ فلسطینیوں کو جبری بیدخل کر دیا گیا ہے۔ انہوں نے کہا کہ 7 اکتوبر کے حملوں کو غزہ کے لاکھوں لوگوں کی اجتماعی سزا کا جواز نہیں بنایا جا سکتا۔ ہم شہریوں کے خلاف تشدد کے حق دفاع کو قبول نہیں کرسکتے۔ تشدد مزید تشدد کی طرف جاتا ہے اور صرف اور صرف نفرت ہی لاتی ہے۔ انہوں نے کہا اسرائیلی آباد کاری پالیسی اقوام متحدہ کی قراردادوں کی خلاف ورزی ہے۔ روسی سفیر نے کہا کہ عدالت اسرائیل کو خلاف ورزیاں ختم کرنے اور ان کا معاوضہ ادا کرنے کا کہنے میں حق بجانب ہوگی۔ اسرائیل کی تمام خلاف ورزیوں کا بہترین حل آزاد فلسطینی ریاست کا قیام ہے۔
