اسرائیل کی وحشیانہ بمباری ہٹلر جیسا طرز عمل ہے، صدر ونیزویلا

کاراکس : وینزویلا کے صدر نکولس مادورو نے غزہ میں صیہونی درندگی کو ہٹلر کے طرزعمل سے تشبیہ دی ہے۔ انہوں نے کہاکہ اسرائیل کی مساجد، اسپتالوں، گرجا گھروں اور آباد رہائشی عمارتوں پر بمباری کا موازنہ نازی فاشسٹ ایڈولف ہٹلر کے طرز عمل جیسا ہے۔ یہ جنگ نہیں فلسطینیوں کی براہ راست نسل کشی ہے۔ مادورو نے پوری دنیا میں غزہ اور فلسطینی کاز کی حمایت میں ہونے والے مظاہروں کیطرف اشارہ کرتے ہوئے کہا کہ دنیا فلسطین کے لیے اٹھ کھڑی ہوئی ہے۔ وینزویلا کے صدر نے نیویارک، پیرس، میڈرڈ، جکارتہ، استنبول اور وینزویلا میں سڑکوں پر آنے والے بڑے ہجوم کی طرف اشارہ کیا۔ اور کہاکہ پوری دنیا کے آزاد لوگوں نے متحد ہوکر فلسطینی عوام کی نسل کشی کی مذمت کی۔