یمن کا امریکا اور برطانیہ کے مقابل نئی حکمت عملی اپنانے کا اعلان

صنعا: یمن نے بحیرہ احمر میں اسرائیل مخالف آپریشن جاری رکھتے ہوئے امریکا اور برطانیہ کے مقابلے کے لئے نئی حکمت عملی اپنانے کا اعلان کیا ہے۔ یمن کے وزیر دفاع محمد ناصر العاطفی نےکہا کہ ہم اپنی طاقت کا استعمال کرتے ہوئے جنگ کے نئے اصول و ضوابط قائم کر رہے ہيں کہ جس کے نتیجے میں امریکی، برطانوی، صیہونی اور ان کے حامیوں کو بھاری قیمت ادا کرنا پڑے گی۔ العاطفی نے کہا کہ یمنی، جنگ پسند اور جارح نہیں ہیں لیکن غزہ کے وحشیانہ جرائم نے یمنی قوم سمیت دنیا کی حریت پسند اقوام کو ان جرائم کے خلاف اپنے موقف کا اعلان کرنے پر آمادہ کیا ہے۔انہوں نے کہاکہ غاصب صیہونی حکومت کے خلاف جنگ میں یمن کا داخل ہونا اور اس کا سمندری محاصرہ ، ایک خود مختار، قومی، اسلامی اور انسانی فیصلہ ہے۔ انہوں نے کہا کہ یمن میں صیہونی حکومت سے متعلق بحری جہازوں کے گزرنے یا بندرگاہوں کی طرف جانے والے بحری جہازوں کو روکے جانے کی کارروائی جاری ہے۔ امریکی اور برطانوی فوجی اور تجارتی جہازوں کے خلاف یمنی مسلح افواج کی کارروائیاں بند نہیں کی جائیں گی۔