امریکا کا یوکرین کو ممنوعہ کلسٹر بم دینے کا اعلان

واشنگٹن: امریکا نے اپنے اتحادیوں اور انسانی حقوق اداروں کی مخالفت کے باوجود یوکرین کو ممنوعہ کلسٹر بم دینے کا اعلان کردیا۔ پینٹاگون نے ایک بیان میں کہا کہ امریکہ یوکرین کو نئے ہتھیار اور گولہ بارود فراہم کرے گا۔اس نے کہا کہ کیف نے ان ہتھیاروں کو اپنی سرزمین پرمحفوظ طریقے سے استعمال کرنے کا عہد کیا ہے۔ قومی سلامتی کے مشیر جیک سلیوان نے صحافیوں کو بتایا کہ ہم تسلیم کرتے ہیں کہ نہ پھٹنے والے کلسٹر بموں سے شہریوں کو نقصان کا خطرہ ہوتا ہے۔ اسی لئے جب تک ہوسکا فیصلے کو موخر رکھا۔ لیکن روس کی جیت یوکرین کے کلسٹر بموں کے حصول کے خطرات سے بھی زیادہ خراب ہے۔ انہوں نے کیف کو کلسٹر بم فراہم کرنا امریکی قومی سلامتی کے مفاد میں قرار دیا۔ صدر جوبائیڈن نے اسے مشکل فیصلہ قرار دیا اور کہا کہ اتحادیوں سے بھی بات کی تھی۔ یوکرین کے پاس اسلحہ ختم ہورہا ہے۔ انہوں نے دعویٰ کیا کہ امریکا نے اپنے تمام کیمیائی ہتھیار تلف کردیے ہیں۔