غزہ کا محاصرہ توڑنے کیلئے ایک ہزار کشتیوں پر مشتمل فریڈم فلوٹیلا بھیجنے کا اعلان

کوالالمپور : ملائیشیا کی سول سوسائٹی کی تنظیموں کے اتحاد نے غزہ کا محاصرہ توڑنے کیلئے ایک ہزار کشتیوں پر مشتمل فریڈم فلوٹیلا بھیجنے کا اعلان کردیا۔ملائیشین کنسلٹیو کونسل آف اسلامک آرگنائزیشنز کے صدر عزمی عبدالحمید نے کہا کہ یہ مہم غزہ پر اسرائیل کی نسل کشی کی جنگ کا براہ راست ردعمل ہے۔ انہوں نے کہا کہ ہم اس وقت خاموش نہیں رہ سکتے جب کہ پورے خاندانوں کا صفایا ہو رہا ہو اور بھوک کو ایک ہتھیار کے طور پر استعمال کیا جا رہا ہو۔
انہوں نے مزید کہا کہ عالمی اداروں کی ناکامی پر عالمی برادری کو کام کرنا چاہیے۔ انہوں نے کشتیوں کی خریداری، لاجسٹکس اور عوامی نقل و حرکت میں مدد کے لیے بین الاقوامی سیکرٹریٹ اور مالیاتی فنڈ کے قیام کا بھی اعلان کیا۔ کونسل نے دنیا بھر میں انسانی ہمدردی کی تنظیموں، کمپنیوں اور افراد سے مہارت، سازوسامان اور وسائل میں حصہ ڈالنے کی اپیل کی ہے۔ دنیا بھر سے یہ کشتیاں غزہ کی جانب روانہ ہوں گی اور ایک ساتھ غزہ کا محاصرہ توڑنے کی کوشش کریں گی۔