صیہونی فوج کی جارحیت، اسکول اور صحافیوں پر حملے، نہتے خواتین و بچوں سمیت 280 فلسطینی شہید

غزہ: صیہونی فوج کے غزہ پر حملے جاری ہیں۔ چوبیس گھنٹوں میں مزید 280 فلسطینی شہید اور ہزار سے زائد زخمی ہوگئے۔ صیہونی جنگی طیاروں اور ٹینکوں نے خان یونس اور رفح میں شدید بمباری اور گولہ باری کی جس سے بھاری جانی نقصان ہوا ہے۔ کئی مکانات اور عمارتیں تباہ ہوگئیں۔
خان یونس میں اقوام متحدہ کے زیر انتظام اسکول بھی بموں کا نشانہ بنا۔ جس میں متاثرین نے پناہ لےرکھی تھی۔ جنگی طیاروں نے اقوام متحدہ کےاسکول پر حملے کے بعد رپورٹنگ کرنے والی الجزیرہ کی ٹیم پر بھی بم گرادیا۔ جس سے کیمرہ مین سامر ابودقہ شہید اور نامہ نگار وائل دہدوہ زخمی ہوئے۔ جنگی طیاروں نے دیرالبلاح۔ الدراج۔ تفح۔ المصری اور سرحان کو بھی نشانہ بنایا۔
القسام بریگیڈز نے کہا کہ اس نے خان یونس میں گھر کو دھماکے سے اڑا دیا جہاں اسرائیلی فوجی چھپے ہوئے تھے۔ کارروائی میں کئی فوجی ہلاک وزخمی ہوئے۔ اسرائیل نے غزہ میں امدادی سامان بھیجنے کیلئے کرم ابو سالم راہداری کھولنے کی اجازت دیدی۔