Raza Musani 
دبئی : افغانستان میں لڑکیوں کی تعلیم کے حق میں بیان دینے پر سینئر وزیر عباس ستانکزئی کو ملک چھوڑنا پڑگیا۔ برطانوی اخبارگارڈین کے مطابق طالبان کے سپریم لیڈر ہیبت اللہ اخوندزادہ کی جانب سے گرفتاری اور سفری پابندی کے احکامات کی وجہ سے عباس ستانکزئی ملک چھوڑ کر متحدہ عرب امارات فرار ہوگئے۔ عباس ستانکزئی نے مقامی میڈیا کو بتایا کہ وہ صحت کی وجوہات کی بنا پر دبئی گئے ہیں تاہم طالبان کی جانب سے اس معاملے پر کوئی تبصرہ نہیں کیا گیا۔ عباس ستانکزئی نے 20 جنوری کو افغان صوبے خوست میں مدرسے کی گریجویشن تقریب سے خطاب میں خواتین کی تعلیم پر عائد پابندی کو شریعت کے خلاف قرار دیا تھا۔افغان نائب وزیر خارجہ نے کہا تھا کہ ملک میں 20 ملین لوگوں کے ساتھ ناانصافی کی گئی ہے۔ خواتین کی تعلیم پر عائد پابندی شریعت کے مطابق نہیں ہے۔
