Raza Musani 
تل ابیب : متنازع عدالتی اصلاحات نے صیہونی معاشرے کو تقسیم کردیا۔ وزیردفاع کی برطرفی پر لاکھوں افراد سڑکوں پر آگئے۔ وزیراعظم بنیامین نیتن یاہو نے عدالتی اصلاحات کی مخالفت کرنے پر اپنے وزیردفاع یواف گیلنٹ کو برطرف کردیا، جس پر عوام بپھر گئے اور تل ابیب میں وزیراعظم کے گھر پر دھاوا بول دیا۔ مظاہرین نے رکاوٹیں توڑ دیں پولیس نے مداخلت کرتے ہوئے مظاہرین کوروکا جس پر علاقہ میدان جنگ بن گیا۔ پولیس نے متعدد افراد کو گرفتار کر لیا۔ گیلنٹ کی برطرفی پر اپوزیشن کے رہنما یائر لاپڈ نے کہا ہے کہ نیتن یاہو قومی سلامتی کے لیے خطرہ ہیں۔ وہ اسرائیل کو کھائی میں پھینکنے کے لیے پرعزم ہیں۔ سابق وزیر دفاع بینی گانٹز نے کہا ہے ہمیں ایک حقیقی خطرے کا سامنا ہے۔ نیتن یاہو کی حکومت میں شامل اتحادی ارکان نے کہا ہے کہ وزیراعظم نے گیلنٹ کو برطرف کرکے ایک تزویراتی غلطی کی۔ اسرائیلی اپوزیشن نے مشترکہ بیان میں وزیر اعظم کو ملکی سلامتی کو خطرے میں ڈالنے کا ذمہ دار ٹھہرایا ہے۔
