جنگ بندی معاہدے کے دوسرے مرحلے پر بات چیت رواں ہفتے دوبارہ شروع ہوگی، امریکی ایلچی

واشنگٹن: غزہ میں جنگ بندی معاہدے کے دوسرے مرحلے پر بات چیت رواں ہفتے شروع ہوگی۔ امریکی صدر ٹرمپ کے ایلچی اسٹیو وٹ کوف نے کہاہے کہ ان کی نیتن یاہو، قطری وزیر اعظم اور مصری انٹیلی جنس سربراہ کے ساتھ ٹیلی فونک گفتگو بہت ہی نتیجہ خیز اور تعمیری رہی۔ انہوں نے کہا کہ اسرائیلی مذاکرات کار جنگ بندی معاہدے کے پہلے مرحلے میں توسیع پر بات چیت کے لیے پیر کو قاہرہ جائیں گے۔ اسٹیو وٹ کوف نے کہا کہ انہوں نے اسرائیل اور ثالث ممالک سے بات چیت کی ہے تاکہ یہ جان سکیں کہ ہم اس وقت کہاں کھڑے ہیں اور کس طرح دوسرے مرحلے کے اختتام تک کامیابی سے پہنچ سکتے ہیں۔ ادھراسرائیلی وزیراعظم نیتن یاہو کے دفتر نے کہا ہے کہ اسرائیلی مذاکراتی ٹیم غزہ میں جنگ بندی معاہدے کے پہلے مرحلے پر عمل درآمد جاری رکھنے پر بات چیت کے لیے آج قاہرہ جائے گی۔ جبکہ آج ہی سیکورٹی کابینہ کے اجلاس میں معاہدے کے دوسرے مرحلے پر بات چیت کی جائے گی۔