Raza Musani 
نیویارک : اقوام متحدہ کے سربراہ انتونیو گوتریس نے طالبان کی جانب سے یو این مشن سے وابستہ افغان خواتین پر پابندی کی شدید مذمت کی ہے۔ سیکریٹری جنرل انتونیو گوتریس نے خواتین عملے پر پابندی کو امتیازی اور بین الاقوامی انسانی حقوق قانون کی خلاف ورزی قرار دیا اور اسے منسوخ کرنے کا مطالبہ کیا۔ انہوں نے کہاکہ خواتین عملے کے ارکان اقوام متحدہ کے آپریشنز بشمول جان بچانے والی امداد کی فراہمی کے لیے ضروری ہیں۔ فیصلے کے نفاذ سے افغان عوام کو نقصان پہنچے گا، جن میں سے لاکھوں اس امداد کے محتاج ہیں۔انتونیو گوتریس نے طالبان سے مطالبہ کیا کہ وہ ایسے تمام اقدامات کو تبدیل کریں جو خواتین اور لڑکیوں کے کام، تعلیم اور نقل و حرکت کی آزادی پر پابندی لگاتے ہیں۔واضح رہے کہ طالبان نے 2021 میں اقتدار میں آنے کے بعد سے خواتین کی آزادیوں پر تیزی سے پابندیاں لگا دی ہیں۔
