Raza Musani 
دمشق: شام پر قابض گروہ نے آئین منسوخ کرتے ہوئے حیات تحریر الشام کے سرغنہ احمد الشرع المعروف ابو محمد الجولانی کو ملک کا عبوری صدر مقرر کردیا۔ شام کے ترجمان ملٹری آپریشن کمانڈ حسن عبدالغنی نے اعلان کیا کہ 2012 کا آئین اور ایمرجنسی پروسیجر کے تحت اپنائے گئے قوانین منسوخ کردیے گئے ہیں۔ احمدالشرع کو عبوری مرحلے کے لیے ایک عارضی قانون ساز کونسل بنانے کا بھی اختیار دیا گیا ہے جو نئے آئین کی منظوری تک اپنا کام انجام دے گی۔
ترجمان نے ملک میں مسلح دھڑوں کو تحلیل کرنے کا بھی اعلان کیا، جو ریاستی اداروں میں ضم ہو جائیں گے۔ اس کے علاوہ بعث پارٹی، جو کئی دہائیوں تک شام پر حکمرانی کرتی رہی کو باضابطہ طور پر تحلیل کر دیا گیا ہے۔
