Raza Musani 
اسٹاک ہوم : سوئیڈن میں عدالت کی اجازت کے بعد انتہا پسندوں نے عید الاضحیٰ کے پہلے روز قرآن کو نذر آتش کردیا۔ سوئیڈن کے دارالحکومت اسٹاک ہوم کی مرکزی مسجد کے باہر انتہا پسند شخص نے قرآن کو پھاڑا اور جلایا۔ اس موقع پر پولیس کی بڑی تعداد انتہا پسندوں کو تحفظ دینے کیلئے موجود رہی۔ مسجد کے سامنے جمع انتہا پسندوں نے اس قبیح اور شرمناک عمل کی نہ صرف حوصلہ افزائی کی بلکہ اس کی ویڈیو اور تصاویر بناتے رہے۔ سویڈن میں قرآن پر پابندی کی مہم چلانے والی عراقی پناہ گزین مومیکا نے بھی قران کو ٹھوکریں ماریں اور اس کی توہین کی۔ پولیس نے قرآن کی بے حرمتی پر آواز اٹھانے والے نوجوان کو اشتعال انگیزی کے الزام میں گرفتار کرلیا۔
واضح رہے کہ سویڈن پولیس نے سیکیورٹی فراہم کرنے سے معذرت کرتے ہوئے موقف اختیار کیا تھا کہ ایسے اجتماعات سے ملک اور شہریوں پر حملے کے خطرات بڑھ جائیں گے اس لیے ایسے مظاہروں کی قطعی اجازت نہیں دی جا سکتی۔ پولیس کے حکم کو عدالت میں چیلنج کیا گیا جس نے نہ صرف قرآن جلانے کی اجازت دی بلکہ پولیس کو حکم دیا کہ اس شرمناک اقدام کو تحفظ فراہم کیا جائے۔
