Raza Musani 
خرطوم : سوڈان کی شمالی ریاست دارفور میں پرتشدد جھڑپوں کے دوران سو سے زائد افراد ہلاک اور درجنوں زخمی ہوگئے۔ دارفور میں بے گھروں کے کیمپوں اور اطراف میں سوڈانی فوج اور ریپڈ سپورٹ فورسز کے درمیان شدید جھڑپیں جاری ہیں دونوں جانب سے بھاری ہتھیاروں کا استعمال کیا جارہا ہے۔ سوڈانی فوج نے الزام لگایا ہے کہ ریپڈ سپورٹ فورسز شہر الجنینہ میں شہری تنصیبات کو نشانہ بنا رہی ہیں۔ آر ایس ایف نے مغربی دارفور کے گورنر خمیس عبداللہ ابکر کو اغوا کرکے قتل کر دیا۔ سوڈانی فوج کے کمانڈر عبدالفتاح البرہان نے دارفور کے گورنر کا قتل ایک سفاکانہ فعل قرار دیا ہے۔ ادھر اقوام متحدہ کے ہائی کمشنر برائے پناہ گزین فلیپو گرانڈی نے سوڈان میں فوری جنگ بندی پرزور دیا ہے تاکہ پناہ گزینوں کے بڑے بحران سے بچا جاسکے۔ انہوں نے کہاکہ خواتین اور لڑکیوں کے خلاف جنسی تشدد کی ہولناک اطلاعات ہیں۔ یہ صورت حال اس وقت تک بدتر ہوتی جائے گی جب تک کہ تنازع کے فریق سوڈان کی تباہ کن لڑائی کو ختم کرنے پر متفق نہیں ہوجاتے۔
