سوڈان: اومدرمان پر فضائی حملہ، 31 افراد ہلاک، درجنوں زخمی

خرطوم : سوڈانی فوج کے اومدرمان شہر پر فضائی حملے میں اکتیس افراد ہلاک اور درجنوں زخمی ہوگئے۔ سوڈان میں فوج اور ریپڈ سپورٹ فورسز آر ایس ایف کے درمیان لڑائی میں شدت آگئی ہے۔ آر ایس ایف نے خرطوم اور اس کے جڑواں شہروں اومدرمان اور بحری پر تیزی سے غلبہ حاصل کر لیا ہے۔ جواب میں سوڈانی فوج نے فضائی اور توپ خانے سے حملے شروع کر دیئے ہیں۔ ہفتے کو سوڈانی فوج نے اومدرمان کے رہائشی علاقے کو نشانہ بنایا 15 اپریل کو لڑائی شروع ہونے کے بعد یہ اب تک کا سب سے مہلک حملہ ہے۔ لڑائی میں اب تک 1133 افراد ہلاک اور سینکڑوں زخمی ہوچکے ہیں۔ 29 لاکھ سے زیادہ افراد بے گھر ہوچکے ہیں جس میں سے سات لاکھ پڑوسی ممالک میں پناہ حاصل کرچکے ہیں۔ امدادی اداروں کے مطابق ملک میں خواتین اور لڑکیوں کی عصمت دری اور اغوا کی تعداد بھی "خطرناک” حد تک بڑھ گئی ہے۔