جی سیون ممالک کا اسرائیل کے حق میں بیان، جاپان اور کینیڈا کا دستخط سے انکار

لندن: غزہ سے حماس کے تباہ کن حملوں کے بعد جی سیون کے پانچ رکن ممالک نے اسرائیل کی حمایت میں ایک مشترکہ بیان جاری کیا ہے تاہم جاپان اور کینیڈا نے اس بیان پر دستخط نہیں کیے۔ یہ بیان فرانس کے صدر ایمانوئل میکرون، جرمن چانسلر اولاف شولز، اطالوی وزیراعظم جارجیا میلونی، برطانیہ کے وزیراعظم رشی سنک اور امریکی صدر جو بائیڈن نے جاری کیا ہے۔ دنیا کے امیر ترین سات جمہوری ممالک کی تنظیم جی سیون کے پانچ ممالک کے رہنماؤں نے ریاست اسرائیل کے لیے مضبوط اور متحد حمایت کا اظہار کیا اور حماس کے حملے کو دہشت گردی قرار دیتے ہوئے اس کی مذمت کی۔ جاپان کے چیف کابینہ سیکریٹری ہیروکازو ماتسونو نے بتایا کہ جاپان گروپ سیون کے سربراہ ملک کے طور پر رکن ممالک کے ساتھ قریبی اشتراک میں کام کر رہا ہے اور امن کے حصول کے لیے ہر ملک کے ساتھ بات چیت کر رہا ہے۔ انہوں نے مزید کہا ’ایسا لگتا ہے مشترکہ بیان اس لیے جاری کیا گیا تاکہ اس معاملے پر ہر جی سیون رکن کے متنوع نقطۂ نظر اور موقف کی عکاسی ہو۔ انہوں نے کہا کہ ’بیان میں جاپان کی عدم شمولیت کو اس کے اپنے نقطۂ نظر میں لچک برقرار رکھنے کی خواہش سے منسوب کیا جا سکتا ہے جبکہ فلسطین اور اسرائیل دونوں پر اثر و رسوخ اور ثالثی کے لیے پس پردہ کردار ادا کر رہے ہیں۔