Raza Musani 
اسلام آباد: پاکستانی دفترخارجہ کی ترجمان ممتاز زہرہ بلوچ نے امریکا کو فوجی اڈے دینے کی قیاس آرائیوں کو بے بنیاد قرار دیا ہے۔ انہوں نے کہا کہ پاکستان کا کسی بھی ملک یا حکومت کو اڈے دینے کا ارادہ نہیں، پاکستان اپنی سرزمین یا فضائی حدود کسی دوسرے ملک کے خلاف استعمال کرنے کی اجازت نہیں دے گا۔ انہوں نے کہاکہ ہندوستان بین الاقوامی سطح پر بھی انسانی حقوق کی خلاف ورزیوں میں ملوث ہے۔ ہندوستان ۔امریکا، کینیڈا اور پاکستان میں ماورائے عدالت ٹارگٹ کلنگز میں ملوث ہے۔ پاکستان کا مطالبہ ہے کہ وہ ان جرائم پر بھارت کا احتساب کریں۔ انہوں نےکہا کہ پاکستان میں دہشتگردی کے واقعات میں افغانستان ملوث رہا ہے، اس حوالے سے افغانستان کو ثبوت فراہم کیے گئے ہیں ، افغانستان سے مطالبہ کرتے ہیں کہ وہ اس حوالے سے کارروائی کریں۔
