Raza Musani 
ہوانا: ایران اور کیوبا نے اقتصادی، سیاسی اور عدالتی تعاون کو وسعت دینے کے لیے چھ معاہدوں پر دستخط کیے ہیں جبکہ نینو ٹیکنالوجی اور بائیو ٹیکنالوجی کے تعاون پراتفاق کرلیا۔ ایرانی صدر سید ابراہیم رئیسی نے کیوبا کے سرکاری دورے کے دوران کیوبن ہم منصب سے ملاقات میں تکنیکی تعاون پر مشترکہ ورکنگ گروپ کی تشکیل کیلئے تجویز پیش کی۔ صدر رئیسی نے کہاکہ انقلابِ اسلامی کی کامیابی کے بعد سے ہی ایران کیوبا تعلقات شروع ہوئے اور پھر دونوں ممالک کے دوطرفہ تعلقات میں وسعت پیدا ہوتی رہی ہے اور خاص طور پر حالیہ برسوں میں جب کورونا وائرس کی عالمگیر بیماری نے دنیا کو اپنی لپیٹ میں لیا تو دونوں ممالک کے درمیان ویکسین تیار کرنے اور بائیو ٹیکنالوجی کے شعبہ جات میں تعمیری اور مثبت تعاون رہا ہے۔ آیت اللہ رئیسی نے کہا کہ امریکہ سمیت دنیا کی دیگر تمام جابر طاقتیں، آزاد اقوام کی طاقت کے خلاف کچھ نہیں کر سکتیں ترقی کی راہ میں ہماری کوششیں اور تعاون آزاد قوموں کی امید اور جابر حکمرانوں کی مایوسی کا باعث ہے۔ انہوں نے دونوں ممالک کے درمیان موجود تعلقات کو خوش آئند اور ترقی پذیر قرار دیا.
