شیعہ افغانستان کا ایک اہم حصہ ہیں،ان کے حقوق کا تحفظ کرینگے، قائم مقام وزیراعظم

کابل: افغان طالبان کے قائم مقام وزیر اعظم مولوی عبدالکبیر نے ماہ محرم الحرام مہینہ کی آمد پر متعدد صوبوں سے تعلق رکھنے والے شیعہ علمائے کرام اور زعماء سے ملاقات کی اور طالبان حکومت کے ساتھ شیعوں کے قریبی تعاون پر زور دیا۔ انہوں نے کہاکہ شیعہ افغانستان کا ایک اہم حصہ ہیں اور ان کی شریعت کی روشنی میں دیئے گئے حقوق کے مطابق حمایت کی جائے گی۔ طالبان کابینہ کے اعلامیے میں کہا گیا ہے کہ ملاقات میں طالبان انتظامیہ کے ساتھ مزید تعاون کے طریقوں پر تبادلہ خیال کیا گیا۔ حکومت کے ترجمان ذبیح اللہ مجاہد نے کہا ہے کہ محرم الحرام میں سکیورٹی کو یقینی بنایا جائیگا تاکہ اس ملک کے شہری، عزاداری کے پروگراموں میں محفوظ طریقے سے شرکت کر سکیں۔ سیکیورٹی فورسز محرم کی حفاظت کو یقینی بنانے کے لیے ایک منصوبہ تیار کر رہی ہیں، تاکہ ہم ان دنوں کو گزشتہ سال کی طرح افغانستان میں بغیر کسی واقعے کے منعقد ہوتا دیکھ سکیں۔ کابل انتظامیہ کے اہم رہنما ذاکر اللہ نے کہا ہے کہ ایک ماہ پہلے ہم نے شیعہ متاثرین اور نمائندوں کے ساتھ بات چیت شروع کی اور کوشش کی کہ وہ سب امارت اسلامیہ پر بیعت کریں اور پھر حکومت میں اپنی پوزیشن کا فیصلہ کریں۔